धनुषा— धनुषाको ढल्केवरस्थित भूमि प्रशासन (साविक मालपोत) कार्यालयलाई बजार क्षेत्रबाट बाहिर सार्न खोजेपछि उत्पन्न विवाद अदालत पुगेको छ । भूमि प्रशासन कार्यालय ढल्केवरलाई विपक्षी बनाएर ढल्केवरका स्थानीय राम अवतार महतो कोइरीले उच्च अदालत जनकपुरमा दायर गरेको रिटमा बिहिबार कारण देखाउ आदेश जारी भएको हो ।
बिहिबार उच्च अदालतका न्यायाधीश कैलाशप्रसाद सुवेदीले मुद्दाका प्रतिवादी भूमि प्रशासन कार्यालय ढल्केवरको नाउमा कारण देखाउ आदेश जारी गर्दै अन्तरिम आदेशका लागि छलफलमा झिकाउने निर्णय सुनाएको हो ।
ढल्केवरस्थित भूमि प्रशासन (साविक मालपोत) कार्यालयलाई बजार क्षेत्रबाट बाहिर सार्ने खोजेपछि ढल्केवर वरपरका स्थानीयसहित व्यवसायीह आन्दोलित बनेका छन् । उनीहरूले सरकारको निर्णयविपरीत कार्यालय स्थानान्तरण गर्न खोजिएको आरोप लगाउँदै आन्दोलित बनेपछि ढल्केवरको अवस्था तनावग्रस्त बनेको हो ।
नेपाल सरकार मन्त्रिपरिषद्को २०७२ असोज १४ गतेको निर्णयअनुसार धनुषाको ढल्केवरमा मालपोत तथा नापी कार्यालय स्थापना गर्ने निर्णय भएको थियो । स्थानीय युवाहरूको लामो संघर्षपछि २०८० मंसिरमा कार्यालय स्थापना भएको थियो भने २०८१ जेठ १८ गतेदेखि विधिवत रूपमा सेवा सञ्चालनमा आएको थियो । मिथिला नगरपालिकाको सदरमुकाम मानिएको ढल्केवर सबैलाई पायक पर्ने केन्द्रको रुपमा स्थापित छ ।
कार्यालय रहेको भवनको दुईवर्षे भाडा सम्झौता अवधि २०८२ मंसिरमा सकिएपछि नयाँ भवन छनोटका लागि सूचना प्रकाशित गरिएको थियो । उक्त सूचनाअनुसार साविककै घरधनीसहित बजार क्षेत्रभित्रका अन्य व्यक्तिहरूले पनि शिलबन्दी दरभाउ पेश गरेका थिए । तर कार्यालय प्रमुख रोहित विश्वकर्माले ढल्केवर बजार क्षेत्रका भवनहरुलाई विभिन्न बहानामा अनुपयुक्त ठहर गर्दै कार्यालयलाई साविक नकटाझिज गाविस क्षेत्रतर्फ सार्न खोजेको मिथिला नगरपालिका वडा नं ६ का वडाध्यक्ष नन्दकिशोर यादवले बताए ।
मिथिला नगरपालिका, गणेशमान चारनाथ नगरपालिका, क्षिरेश्वरनाथ नगरपालिका तथा बटेश्वर गाउँपालिकालाई कार्यक्षेत्र बनाएको उक्त कार्यालय यातायात पहुँच र सेवाग्राहीको सहजताका दृष्टिले पनि बजार क्षेत्रभित्रै रहनुपर्ने वडाध्यक्ष यादवको जिकिर छ ।
भूमि प्रशासन कार्यालय ढल्केवरका प्रमुख रोहित विश्वकर्माले बिहिबार कार्यालय स्थान्तरणको सूचना जारी गर्दै जेठ २१ गते बिहिबार र २२ गते शुक्रबार दुईदिन सेवा अवरुद्ध हुने बताएपछि ढल्केवरको अवस्था तनावग्रस्त बनेको छ । कार्यालय ढल्केवर चोकभन्दा एक किलोमिटर पूर्व साविकको नकटाझिज गाविसमा स्थान्तरण गर्न खोजिएको हो ।
