• फुलगेन मगही

धनुषा— विद्यालयलाई व्यवस्थित बनाउँदै पठन–पाठनलाई गुणस्तरीय बनाउने उद्देश्यका साथ धनुषाको बटेश्वर गाउँपालिका–१ स्थित श्री राष्ट्रिय आधारभूत विद्यालय विजयपुरमा युवाको नेतृत्वमा नयाँ विद्यालय व्यवस्थापन समिति गठन गरिएको छ ।

बिहिबार सम्पन्न अभिभावक तथा सरोकारवालाको भेलाबाट विमलेश कुमार महतोको अध्यक्षतामा नयाँ व्यवस्थापन समिति चयन गरिएको हो ।

समितिमा जयनारायण महतो, रामसोगारथ महतो, अनितादेवी महतो, आशादेवी महतो र कृष्णी देवी महतो सदस्य रहेका छन् । यस्तै, शिक्षक प्रतिनिधिका रूपमा मनोहर महतो रहेका छन् भने बटेश्वर गाउँपालिका–१ का वडाध्यक्ष अशोक कुमार महतो पनि समितिको सदस्यमा समेटिएका छन् । समितिको सदस्य सचिवमा विद्यालयका प्रधानाध्यापक श्री नारायण साह रहेका छन् ।

नवगठित समितिले विद्यालयको भौतिक तथा शैक्षिक वातावरण सुधार, शिक्षक–विद्यार्थीबीचको सम्बन्ध सुदृढीकरण, नियमित पठन–पाठनको सुनिश्चितता र अभिभावक सहभागिता बढाउने लक्ष्य लिएको जनाएको छ । युवाको नेतृत्वमा समिति गठन भएकाले विद्यालयको समग्र विकासमा सकारात्मक परिवर्तन आउने अपेक्षा गरिएको छ ।

स्थानीय अभिभावक तथा सरोकारवालाहरूले नयाँ व्यवस्थापन समितिप्रति विश्वास व्यक्त गर्दै विद्यालयको गुणस्तर अभिवृद्धिमा सहकार्य गर्ने प्रतिबद्धता जनाएका छन् ।