इजरायली कारबाहीमा ७ प्यालेस्टिनीको मृत्यु, गाजामा मृतकको संख्या ५३,४७५ पुग्यो

एजेन्सी— दक्षिणी गाजापट्टीको शहर खान युनिसमा सोमबार इजरायली सैन्य कारबाहीका क्रममा एक फिल्ड कमाण्डरसहित कम्तिमा सात प्यालेस्टिनीको मृत्यु भएको छ।

स्थानीय र चिकित्सा स्रोतहरूका अनुसार, नागरिक पोशाकमा आएका इजरायली विशेष बलले शहरको अल-कातिबा छिमेकमा घुसपैठ गरी पपुलर रेसिस्टेन्स कमिटिजसँग सम्बन्धित नासेर सलाह अल-दिन ब्रिगेडका कमाण्डर अहमद सरहानलाई मारेको थियो। सेना फर्कनुअघि सरहानकी श्रीमती र बालबालिकालाई नियन्त्रणमा लिएको थियो।

खान युनिसको नासेर अस्पतालका चिकित्सा अधिकारीहरूले इजरायली कारबाहीका क्रममा भएका हवाई र तोपखानाको श्रृंखलाबद्ध आक्रमणमा मारिएका सरहानसहित सात जनाको शव प्राप्त भएको पुष्टि गरेका छन्।

स्थानीय बासिन्दाहरूले सिन्ह्वा समाचार एजेन्सीलाई बताएअनुसार इजरायली युद्धविमान र हेलिकप्टरहरूले अल-कारारा, अल-फुखारी, बानी सुहेला क्षेत्रहरू, साथै अल-अक्सा विश्वविद्यालय र स्ट्रिट ५ वरपरका धेरै स्थानहरूलाई लक्षित गर्दै ३० भन्दा बढी आक्रमणहरू गरेका छन्।

इजरायलले विगत १९ महिनाभन्दा बढी समयदेखि गाजामा सैन्य अभियानहरू सञ्चालन गर्दै आएको छ, जसमा प्यालेस्टिनी सशस्त्र समूहहरूसँग सम्बन्धित स्थानहरूलाई लक्षित गर्न विशेष एकाइ र गुप्तचर उपायहरू प्रयोग गरिएको छ। यस लामो समयदेखि जारी इजरायली आक्रमणले गाजामा हालसम्म ५३,४७५ प्यालेस्टिनीको मृत्यु भइसकेको छ भने १ लाख २१ हजार ३ सय ९८ जना घाइते भएका छन्।