प्रदेश २ : प्रदेश कृषि विश्वविद्यालय सम्बन्धी अध्यादेश पारित

जनकपुरधाम— प्रदेश २ सरकारले ल्याएको प्रदेश कृषि विश्वविद्यालय सम्बन्धी अध्यादेश प्रदेशसभा बैठकबाट पारित भएको छ ।

बिहीबार बसेको प्रदेशसभा बैठकमा सामाजिक विकासमन्त्री नवल किशोर साहले कृषि विश्वविद्यालय सम्बन्धी अध्यादेश २०७८ लाई स्वीकृत गरियोस् भनि पेस गरेको प्रस्ताव बहुमतले स्वीकृत भएको उपसभामुख उपमा देवले जनाइन् ।

यसअघि प्रमुख प्रतिपक्षी लोकतान्त्रिक समाजवादी पार्टी नेपालका प्रमुख सचेतक परमेश्वर साहले प्रदेश कृषि विश्वविद्यालय २०७८ अस्वीकार गर्न पेस गरेको प्रस्ताव बहुमतबाट अस्वीकृत भएको थियो ।

बैठकमा भएको छलफल क्रममा सत्तारुढ नेपाली काँग्रेसका प्रदेशसभा सदस्य शिवचन्द्र चौधरीले अध्यादेश ल्याउने प्रक्रिया गलत भए पनि विधेयक नै रद्द गर्नुपर्ने आवश्यकता भने नरहेको बताए ।

तर विश्वविद्यालयको नाममा भने उनले आपत्ति जनाए । प्रदेशसभा सदस्य चौधरीले भने, ‘विश्वविद्यालय विश्वभरका व्यक्ति आएर पढ्ने ठाउँ रहेकाले यसमा प्रदेशको टोपी लगाइदिने ? सुन्नु भएको छ यस्तो नाम पनि कहिल्यै ?’

उनले विश्वविद्यालयमा प्रदेश थपेपछि त्यसको महत्व घट्ने पनि बताए । प्रमुख प्रतिपक्षी लोसपा नेपालका प्रदेशसभा सदस्य जानकीशरण साहले प्रदेश सरकारले ल्याएको अध्यादेशको विरोध गरे ।

उनले सामान्य परिस्थितिमा पनि अध्यादेश ल्याउनु खेदजनक रहेको टिप्पणी गरे ।