झापा— हुलाकी सडकअन्तर्गत झापाको गौरीगञ्ज गाउँपालिका र झापा गाउँपालिका जोड्ने कन्काइमाई खोलामा १४ वर्षदेखि अधुरो पुल अलपत्र छ । पक्की पुल नबन्दा स्थानीयहरू अहिले पनि बाँसको भाटे पुल तरेर आवतजावत गर्न बाध्य छन् ।

पुलमुनी बनाइएको अस्थायी भाटे पुलमा मोटरसाइकल र साइकल यात्रुको दैनिक चाप उल्लेख्य छ । त्यहीँ बसेर १७ वर्षीय सुमन माझी यात्रुसँग शुल्क उठाइरहेका भेटिन्छन् । उनका बुबा सुदानन्द र हजुरबुबा ईश्वर माझीले गर्दै आएको कामलाई उनले निरन्तरता दिएका हुन् । अहिले बुबा र हजुरबुबालाई पालो दिएर उनी आफैं खटिएका छन् ।

भाटे पुल तर्दा मोटरसाइकलसँग १०० रुपैयाँ, साइकलसँग ५० रुपैयाँ र पैदल यात्रुसँग २० रुपैयाँ लिइन्छ । गत वर्षसम्म मोटरसाइकलको शुल्क ५० रुपैयाँ थियो । यो वर्षदेखि १०० रुपैयाँ पुर्‍याइएको छ । सुमनका अनुसार १०० रुपैयाँ तिरेपछि दिनभर जतिपटक आवतजावत गरे पनि अतिरिक्त शुल्क लाग्दैन । स्थानीयका अनुसार दैनिक २०० भन्दा बढी मोटरसाइकल उक्त पुलबाट गुड्छन् । तर सुमन भने ३०–४० वटा मात्रै आवतजावत हुने दाबी गर्छन् ।

यो क्षेत्र राजनीतिक दृष्टिले पनि चासोको विषय बनेको छ । केपी शर्मा ओली यही आसपासका मतदाताबाट निर्वाचित भई चार पटक प्रधानमन्त्री बनेका हुन् । त्यस्तै, बालेन शाह जस्ता नेताहरूले पनि यस क्षेत्रका मतदातालाई आफ्नो पक्षमा पार्ने प्रयास गरिरहेका छन् । तर स्थानीयका अनुसार जोसुकै पुगे पनि शुल्क नतिरी भाटे पुल तर्न दिइँदैन ।

सुमनका अनुसार सानै हुँदा यहाँ पक्की पुल निर्माण सुरु भएको थियो, तर अझै पूरा भएको छैन । “हजुरबुबाले यही काम गर्नुहुन्थ्यो, त्यसपछि बुबाले गर्नुभयो, अहिले म पनि खटिएको छु,” उनले भने, “बर्खामा नाउ चलाउँछौं, हिउँदमा पुल बनाउँछौं ।” पुलभन्दा केही पर डुंगा राखिएको छ ।

गौरीगञ्ज गाउँपालिकाले बर्खामा दुईवटा नाउ सञ्चालनका लागि ठेक्का दिएको वडाध्यक्ष कात्तिकलाल राजवंशीले बताए । उनका अनुसार मोटरसाइकलबाट अधिकतम ८० रुपैयाँसम्म लिने गरी ठेक्का दिइएको हो । १०० रुपैयाँ असुलिएको गुनासो आएपछि ठेकेदारलाई सम्झाइएको उनले बताए ।

कन्काइमाई नदीमा पुल निर्माण २०६८ सालमा सुरु भएको थियो । पप्पु–महादेव–खिम्ती जेभीले ७ सय मिटर लामो पुल २०७२ जेठभित्र सम्पन्न गर्ने गरी सम्झौता गरेको थियो । तर पाँच पटक म्याद थप्दा पनि ५६ प्रतिशत मात्र काम सकिएपछि गत मंसिर ११ गते ठेक्का सम्झौता तोडिएको थियो ।

हुलाकी राजमार्ग निर्देशनालय, योजना कार्यालय इटहरीका सूचना अधिकारी इन्जिनियर उपेन्द्र दासका अनुसार नयाँ ठेक्काका लागि १६५ करोड रुपैयाँ स्रोत सुनिश्चितताको प्रस्ताव अर्थ मन्त्रालय पठाइएको थियो । तर मन्त्रालयले स्रोत सुनिश्चित नगर्दा पुनः ठेक्का प्रक्रिया अन्योलमा परेको छ ।

यता झापाकै अर्को ठूलो नदी रतुवामा भने १७ वर्षपछि पुल निर्माण सम्पन्न भएको छ । रतुवा पुल को उद्घाटन गत असार २९ गते तत्कालीन प्रधानमन्त्री ओलीले गरेका थिए । पुल बनेपछि स्थानीयको सास्ती अन्त्य भएको छ ।

तर कन्काइमाईको अधुरो पुल अझै चुनावी एजेन्डामै सीमित छ । महेन्द्र राजमार्ग स्तरोन्नतिका कारण हुलाकी सडकमा सवारी चाप बढेको छ । पुल नहुँदा यात्रु महँगो शुल्क तिरेर जोखिमपूर्ण यात्रा गर्न बाध्य छन् ।

आसन्न आम चुनावमा कन्काइ पुलको बाँकी काम प्रमुख मुद्दा बने पनि कार्यान्वयन भने अझै अनिश्चित देखिएको छ । स्थानीयहरू सुविधा भन्दा पनि आश्वासन मात्र दोहोरिँदै आएको गुनासो गर्छन् ।