बलिउडका चर्चित फिल्म निर्देशक निशिकान्त कामतको निधन

एजेन्सी- बलिउडका चर्चित निर्देशक निशिकान्त कामतको निधन भएको छ । दृश्यम’, ‘मुम्बई मेरी जान’ का निर्देशक कामतको ५० वर्षको उमेरमा निधन भएको हो ।

उनको उपचार भइरहेको एआईजी अस्पतालले बयान जारी गर्दै सोमबार बेलुका करिब साढे चार बजे उनको निधन भएको जानकारी दिएको छ । उनी पछिल्लो दुई वर्षदेखि लिभर सिरोसिस रोगबाट ग्रसित थिए ।

उनी जुलाई ३१ देखि हैदराबादको एक अस्पतालमा भर्ना थिए । नायक अजय देवगत र रितेश देशमुखले ट्वीट गरेर दुःख जताएका छन् ।

उनले निर्देशन गरेको फिल्म दृश्यममा काम गरेका अजय देवगनले उनको निधनमाथि शोक व्यक्त गर्र्दै उनीसँगको सम्बन्ध दृश्यमसम्म मात्रै सिमित नभएको बताए । उनले लेखेका छन्, ‘उनीसँगको सम्बन्ध त्योभन्दा पनि निकै माथि थियो । उनी सधैं हाँसिरहने र अत्यधिक प्रतिभाशाली कलाकार थिए । उनी निकै छिटो बिदा भए ।

निशिकान्त कामत सन् २००८ मा ‘मुम्बई मेरी जान’ फिल्मबाट निर्देशनको क्षेत्रमा कदम राखेका थिए । उनले थुप्रै फिल्ममा अभिनय पनि गरेका थिए । उनले जोन अब्राहमको फिल्म रकी ह्यान्डसममा भिलेनको भूमिका निभाएका थिए ।