ढल्केवर— धनुषाको बटेश्वर गाउँपालिकामा पालिका स्तरीय खुल्ला क्रिकेट प्रतियोगिता सुरु भएको छ । बटेश्वर गाउँपालिका–३ स्थित रहेको जनशक्ति माध्यमिक विद्यालयको खेलमैदानमा स्थानीय प्रगतिशील युवा क्लबको आयोजनामा सोमवारबाट सुरु भएको उक्त प्रतियोगिताको उद्घाटन बटेश्वर गाउँपालिकाकी उपाध्यक्ष फुलकुमारी सिंहले गरेकी हुन् ।
कार्तिक २३ गतेसम्म चल्ने यो प्रतियोगितामा आयोजकसहित १६ टोलीहरूको सहभागिता रहेको क्लवका सचिव प्रभात महतोले जानकारी दिए । उनका अनुसार विजेता टोलीलाई ३५ हजार रुपैयाँ नगद र सिल्ड प्रदान गरिनेछ भने उपविजेताले २० हजार नगद र सिल्ड प्राप्त गर्नेछ ।
क्लबका अध्यक्ष मुकेश सिंहको अध्यक्षता तथा पालिका उपाध्यक्ष सिंहको प्रमुख अतिथ्यमा भएको उद्घाटन कार्यक्रममा समाजसेवी देवनारायण साह, वडा नं. १ का अध्यक्ष अशोककुमार महतो, वडा नं. ३ का अध्यक्ष राममणि कुशवाहा, र वडा नं. ५ का अध्यक्ष शिवकरण यादवलगायतको उपस्थिति थियो ।
सोमवार भएको प्रतियोगिताको उद्घाटन खेलमा आयोजक टोली प्रगतिशील युवा क्लबले भंगहा नगरपालिकाको टोलीलाई ७ विकेटले पराजित गर्दै जित हात पारेको छ ।
