जनकपुरधाम- नेपाल–भारत सीमा नजिकै धनुषाको नगराइन नगरपालिकामा हात खुट्टा बाँधिएको अवस्थामा एक महिलाको शव फेला परेको छ ।
अन्दाजी ३० वर्षीया महिलाको शव नगराइन नगरपालिका-२ जटहीस्थित सीमा नजिकैको दुर्गापट्टी धार नजिकै फेला परेको प्रहरीले जनाएको छ । हात र खुट्टा दुवै बाँधिएको अवस्थामा महिलाको शव फेला परेको सीमा प्रहरी चौकी जटहीले जनाएको छ ।
करिब १५ दिन अगाडि नै महिलाको मृत्यु भएको हुन सक्ने प्रहरीको अनुमान छ । मृतक महिलाको शरीरको अधिकांश भाग गलिसकेको र कतिपय भाग जनावरले खाइसकेको अवस्थामा फेला परेको प्रहरीले जनाएको छ ।
मृतक महिलाको शवलाई पोष्टमार्टमका लागि प्रादेशिक अस्पताल जनकपुरधाम ल्याइएको छ भने घटनाबारे अन्य अनुसन्धान भइरहेको प्रहरीले जनाएको छ ।
साभारः अनलाइनखबर
© 2024, All right reserved to Sanchar Bureau
Powered by: Nawa Mithila Sanchar Pvt Ltd
